Nagapadayon pa ang imbestigasyon sang EB Magalona Municipal Police Station angot sa pagluthang sa wala pa nakilal-an nga lalaki nga nasapwan sa Hacienda Baga-as, Barangay Tabigue kaina sang kaagahon.
Sa interview sang Bombo Radyo Bacolod kay Police Captain Joseth Catonina, alas 05:00 ang takna sa kaagahon sang nakabaton sila sang impormasyon nagikan kay Edilberto Palma, 63 anyos sang Barangay Cudangdang nga may yara sang pilason nga lalaki sa higad sang dalan.
Wala man sang malapit nga pamalay sa lugar bangud napalibutan ini sang kampo.
Natabuan man nga may yara sang nagapatrolya nga police malapit sa lugar gani gilayon man nila ginpadulungan ang lugar.
Sa pag-usisa, ang lalaki ang may pilas sa ulo kag may yara pa sang senyales nga buhi pa ini.
Gilayon man nila gindala sa ospital ang biktima.
Padayon pa ang pagbulong sang biktima sa ospital samtang wala pa man matumod ang biktima.
Suno kay Catonina, nagpatigayon man sila sang hot pursuit operation sa lugar kag nagpangita man sang ebidensya agud nga matumod ang biktima.
Nagapanawagan man ini sa tanan nga mga nakakilala sa biktima nga nagasuksok ini sang green sweat shirt kag maong shorts.
Ginabanta nagaedad sang 35 anyos pasaka, medyo kalbo ang buhok kag medium built ang lawas.
Kun sin-o man ang nakakilala makig-angot lang sa EB Magalona Municipal Police Station.
