Ipamatud-an na sang Pilipinas sa iban nga pungsod nga nakahimo na ini sang record sa patag sang gymnastics kag may masanag nga future ang pungsod sa nasambit nga sport event.
Suno sa Gymnastics of the Philippines (GAP), nadag-an sang Pilipinas ang bidding sa pag-host sang 2025 Junior World Artistic Gymnastics Championships.
Ini ang patigayunon sa Hulyo 12-21 sa masunod nga tuig kun sa diin 93 ka mga pungsod ang magapasakop.
Suno kay GAP president Cynthia Carrion, wala pa sang natumod nga official venue.
Ginalauman na nga mas makilala diri nga event kag mas makapakita sang maayo nga performance si Karl Eldrew nga manghod sang two-time Olympic gold medalist nga si Carlos Yulo.
Suno kay Carrion, ginalantaw nila nga mabulsa ni Eldrew ang gold medal.
Magluwas diri, ginapreparahan na sang Pilipinas ang pagpasakop sa 2028 Los Angeles Olympics kun sa diin ginalauman nga matupungan kun indi man malapawan ang duha ka gold medals ni Caloy sa artistic gymnastics.
Ginpahayag man ni Carrion nga nagalaum siya nga duha ka mga Yulo ang maga-compete sa Los Angeles sa amo nga tuig.
Antes ang Olympics, mangin masako sa 2025 si Caloy ilabi na sa World Championship, World Cup, Southeast Asian Games kag Asian Championships magluwas pa sa pagkadto sa training camps sa United States, Spain, Korea, Japan, Australia kag sa United Kingdom.
