Nagapangita na ang Pilipinas sang mga alternatibo nga makuhaan sang produktong petrolyo agud masiguro ang suplay sang gatong karun nga wala sang kasiguraduhan ang sitwasyon sa global market.
Sa Press Briefing sang Martes sa New York, ginpahayag ni Presidente Ferdinand “Bongbong” Marcos Jr. nga nagapakig-angot na ang gobyerno sa iban pa nga pungsod nga nagasuplay sang langis.
Suno sa presidente, ang nagapanguna nga problema subong amo ang wala mahibaluan kun tubtob san-o ang paggiho sang presyo sang produktong petrolyo sa global market bangud sa nagakatabo nga tensyon sa Middle East.
Apang nagpasalig ang presidente nga padayon ang paghimo sang mga tikang agud mapunggan ang padayon nga pagsaka sang presyo sang mga balaklon sa pungsod.
Madumduman nga sang nakaligad nga adlaw nagdangat sa $100 kada bariles ang presyo sang langis sa global market, kag ini ang ginakahangaw-an sang gobyerno apang nagnubo na ini sa subong sa $90 kada bariles.
Apisar nagnubo naang presyo, suno sa presidente, mabug-at man ini sa gihapon bangud madumduman nga yara lamang sa $72 ang presyo sang kada bariles.
