Ginpanginbulahan ni President Ferdinand “Bongbong” Marcos ang gymnast nga si Carlos Yulo matapos nga magdaog sang una nga Olympic gold medal para sa Pilipinas sa 2024 Paris Olympics.
Nadag-an ni Yulo ang gold sa floor exercise sa Olympic gymnastics, kun sa diin ikaduha nga Olympic gold medalist matapos sang weightlifter nga si Hidilyn Diaz sadtong Tokyo Olympics tatlo na ka tuig ang nakaligad.
Suno sa facebook post, ginpahayag ni Marcos nga proud ang Pilipinas kay Yulo.
Confident man ini nga indi ini ang ulihi nga medalya para sa Pilipinas sa Summer Games.
Si Yulo ang may yara sang tsansa nga makakuha sang isa pa ka medalya sa vault finals subong nga Domingo.
Nahibaluan nga naghimo sang kasaysayan si Carlos Yulo sa Paris.
Ini matapos nga siya ang pinakauna nga Filipino gymnast nga nga nakalab-ot sa podium sa anuman nga edition sang Summer Games, nga nakuha ang bulawan nga medalya sa 2024 Paris Olympics, kahapon, Sabado sa Bercy Arena.
Ang 24 anyos nga gymnastics ace ang nakarecord sang stunning nga 15.00 sa iya halos perfect nga routine, ini ang nakuha sa 6.600 sa difficulty kag 8.400 sa execution agud nga magpanguna kag makuha ang una nga gold medal para sa Pilipinas sa nagapadayon nga Paris Olympics.
Bangud gold medalist na si Yulo, ini ang makakuha sang Fully furnished 2-bedroom condominium unit sa Mckinley Hill nga nagabalor sang P24 Million.
Samtang ginpahayag ni House appropriations panel chair and Ako Bicol Rep. Zaldy Co. nga ang House of Representatives ang maga-award sa Olympic gold medalist Carlos Yulo sang P3 million bilang pagkilala sa maragtason nga achievement sini sa Paris Olympics.
Nahibaluan nga ini ang ikaduha nga bulawan nga medalya sa maragtas sang pungsod matapos nga una nga makuha ni Hidilyn Diaz ang gold medal sa weightlifting competition sadtong 2020 Tokyo Olympics.
