Gintinduhan sang Iglesia ni Cristo pinaagi kay Brother Edwil Zabala nga kinahanglan sang kalinong, pag-isa kag pagsunod sa rule of law sa pungsod, kasunod sa nangin pag-aresto kay former President Rodrigo Duterte.
Liwat nga gin-athag ni Zabala, ang madugay na tindog sang INC, nga dapat mahatag ang hustisya apang sa idalom sang layi sang Pilipinas.
Ginpahanumdom sini ang ginpatigayon nga National Rally for Peace sang Enero 13, kun sa diin ginpanawagan sang INC sa mga nagapamuno sa gobyerno nga ipaiway ang konflikto sa politika kag magfocus sa matuod nga isyu sa pungsod.
Suno diri, ginbaliwala ang nasambitan nga panawagan, nga nagpalala pa sa pagbinahin-bahin indi lamang sa mga opisyal sang gobyerno, subong man sa mga ordinaryo nga Pilipino.
Pahayag pa sini nga nagakabuyagyag na sa international community ang kinagamo sa politika sa Pilipinas.
Apisar nga wala derekta ng ginmensyonar ang International Criminal Court (ICC), gintindugan ni Zabala nga ang mga Pilipino nga gin-akusaran sa paghimo sang sala ang dapat manabat sa layi sang Pilipinas kag indi sa korte sang iban nga pungsod.
Pahanumdom sini nga may ikasarang pa ang Judicial system sa Pilipinas sa paghatag sang hustisya.
Ginkondenar man sang INC ang mga pagtinguha nga matwist ukon imanipulate ang layi para sa pagpamulitika.
Panawagan ni Zabala sa mga otoridad nga ipatuman sang patas ang mga legal process, kag indi nga para lamang sa interes sang indibiwal.
Ang pahayag ni Zabala ang ginpagwa sa tunga sang mainit nga diskusyon tuhoy sa pag-aresto kay Duterte, kaangay sa mga kwestyon kun dapat bala nga sa ICC ukon sa jurisdiction sang Pilipinas talakayon ang kaso sang anay Presidente.
Maathag ang panindugan sang INC, nga ang mga Pilipino nga nakasala ang dapat kasuhan sa idalo sa Philippine judicial system.
