Nagsaka na sa apat ka Pilipino ang na-report nga nasamaran sa pag-atake sa King Khalid International Airport sa Riyadh, Saudi Arabia sang Sabado, Oktubre 10.
Tatlo sa mga pilason ang napahamtang sa karon sa ICU samtang ang isa naman ang natalana nga ma-discharge sa ospital, base sa ginpagwa nga pahayag sang Department of Migrant Workers (DMW) kahapon, Oktubre 11.
Wala naman sang na-record nga ginbawian sang kabuhi sa nasambit nga pagpang-atake.
Dose tanan ka mga indibidwal ang nautas ang kabuhi samtang 309 naman ang pilason sa pag-atake sang Houthi sa nasambit nga Airport sa Riyadh sang Sabado.
Suno naman kay Labor Attaché Dominador Salanga sang Migrant Workers Office (MWO) sa Riyadh, kaupod ang Workers Welfare Administration (OWWA), padayon sila nga nagahatag sang suporta sa mga kinahanglanon nga bulig sang mga pilason nga Pilipino.
Dugang pa ni Salanga, nagapakig-angot na ang ila talatapan sa mga lokal nga otoridad kag mga ospital sa Riyadh agud kumpirmahon kun may iban pa nga Pilipino ang naulamid sa insidente.
Gin-abisohan naman sang ahensya ang mga OFWs sa Saudi Arabia nga maglikaw sa mga lugar nga mahimo mangin target sang pag-atake, kag dapat sundon ang mga anunsyo sang embahada, konsulado, kag MWOs sa Saudi Arabia, pati ang mga social media page sang gobyerno sang ila pungsod para sa mga update.
Para naman sa mga OFWs nga natalana nga magpauli sa pungsod, sila ang gina-agda sang DMW nga tawagan ang ila nga airline antes magpadulong sa airport kag regular nga i-tsekyar ang e-mail nga gingamit sa pag-book, mangin ang e-mail sang ila mga employer.
Pahanugyan man sang ahensya nga likawan ang pagkuha sang video ukon litrato sang mga nasambit nga pag-atake kasubong man ang pag-post sini sa social media bangud isa ini ka paglapas sa layi sang Saudi Arabia.
