P6.50 ang pinakabarato samtang P9.50 naman ang bili sang pinakadako nga itlog sang manok nga ginabaligya sa mga merkado sa ciudad sang Bacolod kag sa bilog nga probinsya sang Negros Occidental.
Kahapon, nagpaandam ang Agricultural Sector Alliance of the Philippines Inc. (AGAP) nga mahimo nga magdangat sa P10 tubtob P15 ang bili sang itlog bangud sa pagmahal sang production cost kag mga kaso sang bird flu.
Sa interview sang Bombo Radyo kay Provincial Veterinarian Dr. Placida Lemana, wala sang problema sa supply sang itlog sa Negros Occidental bangud 90 tubtub 100 porsyento nga self-sufficient ang probinsya.
Santo sa data, nagadangat sa 950,000 tubtub one million ang kadamuon sang itlog nga maproduce sa bilog nga probinsya kada adlaw samtang one million man ang konsumo sang Bacolod kag Negros Occidental.
Ang nagasagod sang layers ang nagabaligya sang tubtub 500,000 ka itlog sa Negros Oriental apang may nagasulod man nga supply nagikan sa Bantayan, Cebu kag isla sang Panay nga halos pareho man kadamo sa nagagwa.
Suno kay Lemana, may nagasulod nga itlog nagikan sa Panay kag Cebu kada adlaw samtang ginadumilian sa karon ang pagsulod sang itlog nagikan sa Luzon magluwas sa balut nga ginapaluto gilayon.
Santo sa monitoring, may mga nag-untat sa pagsagod sang layers bangud ang ila breeder stock ang nagikan sa Luzon.
Suno kay Lemana, indi pwede makapasulod sang ready to lay nga manok sa Negros Occidental bangud sa bird flu outbreak, apang ang nag-untat sa pagsagod sang layers ang magagmay lamang nga players sa industriya.
Bangud padayon ang major players kag nagdugang man sila sang breeder stock, bastante gihapon ang supply sang itlog sang manok sa Negros Occidental.
