Ginapadayaw ang pagkahuman sang ginakabig pinakamalaba nga mural painting sa ciudad sang Bacolod nga naangot sa Masskara Festival 2024 celebration.
Sa interview sang Bombo Radyo Bacolod kay Armando Guevarra, Business Manager sang Davies paint, nakita sang mga ini ang pader nga bakante kag nanugunan ang mga ini nga ginavandalize lang.
Suno kay Guevarra, bangud sini nakapanumdom siya nga butangan nalang sang mural painting ang bakante kag ginavandalize nga pader kag natabuan man nga ginaselebrar sang ciudad ang Masskara Festival 2024.
Agud nga matigayon nagtie-up sila sa mga artists kag volunteers agud nga mapatigayon sang mural painting.
Ang mural painting ang may kalabaon nga 150 meters ukon 450 feet.
Suno kay Guevarra mahimo nga ang nasambit nga mural ang pinakamalaba nga makita sa Mabini street sa ciudad sang Bacolod.
Ginbululigan sang kapin 70 ka mga artists kag volunteers agud nga matigayon ang mural painting nga natapos sa sulod sang tatlo ka adlaw.
Gintiguluhan naman ang mural painting sang Bacolod Wall Story bangud indi lang ini basta drawing kundi ang tanan nga makita nga painting ang may estorya.
Pila sa makita nga estorya sa mural painting ang pagluntad sang sugar crisis sadto sa Negros Occidental kag ang pagkalunod sang barko nga Don Juan nga rasun sa pagpatigayon sang Masskara Festival.
Nagpangagda man si Guevarra sa mga Bacolodnon kag turista nga bisitahan ang mural painting sa Mabini Street agud nga makita man ang gin-ubra sang mga Bacolodnon kag Negrense artists.
