Mahimo nakakita na kita sa mga pelikula sang mga kasapatan nga nagahambal, apang nakakita na bala kamo sang sapat sa matuod-tuod nga kabuhi nga nagakapot sang pwesto sa gobyerno?.
Isa ka kuring ang nagsikat sa social media bangod sa tuman sini kadako nga mata kag tiil nga karun natalana na nga mangin pinakauna nga non-human nga magaserbe bilang alkalde sa Hell, Michigan sa Estados Unidos sang isa ka adlaw.
Ang banwa sang Hell, nga naga-offer sa bisan sin-o sang tyansa nga magserbe bilang alkalde sang isa ka adlaw sa balor nga 100 dollars ukon masobra P5,200, ang nagsugot nga himuon nga first animal mayor ang kuring nga ginkilala kay Jinx.
Si Jinx ang nagapuyo sa California upod sa iya nga agalon nga si Mia, kag siya ang may 735,000 followers sa Tiktok kag 400,000 followers sa Instagram.
Suno kay Mia, naghalog ini sa Twitter kag nagpahayag nga si Jinx ang magapadalagan bilang Presidente.
Nakakita naman ini sang mga sapat nga nangin alkalde sadto gani nagtweet ini sang pamangkot kun paano mahimo nga alkalde si Jinx tubtob sa may nagmensyunar sang Michigan kun sa diin sarang makabayad agud nga mangin alkalde sa banwa sang Hell sa sulod sang isa ka adlaw.
Gin-adoptar ni Mia si jinx tatlo ka tuig na ang nagaligad matapos nga masapwan ini sa ila nga ugsaran.
Pahayag sini nga sang ginrescue niya si Jinx sang 2018, wala ini sang plano nga mag-alaga sang kuring.
Paathag sini nga halin siya sa isa ka football game sadto kag nakabati nalang ini sang tingog sang kuring sa ila nga ugsaran sang iya nga pagpauli kag didto sini nakita ang tuman ka gamay nga kuring nga yara palang sa tatlo ka semana ang edad.
Sunod naman sini natalupangdan samtang nagadako ang kuring nga nagadako man ang mata sini pati na ang mga tiil.
Pasalig naman sang veterinarian nga wala ini sang balatian kag si Jinx ang healthy kag may-ara lang ini sang birth defects.
Indi man ini parehas kapasik sa kalabanan nga kuring.
Si Jinx ang magapanumpa bilang alkalde virtually sa Abril 24.
Siya ang magaserbe bilang alkalde sang isa ka adlaw, kag ini ang magatakop sa pagtawag gikan kay Reverend Vonn, ang Minister of Hell nga magapahibalo sang iya nga impeachment.
Pahayag ni Reverend Vonn, palangga nila ang ila in-person kag layo nga mga alkalde.
