Nangin maka-environment ang Amsterdam sa nangin tikang sa pagtapna sang madugay na nga problema tuhoy sa pagpangihi sa higad higad sang mga pumuluyo.
Ngatukod sang walo ka ilihian ang local council para mangin “wild peeing” hotspot, nga may duta sa ibabaw.
Sa una nga paglantaw, ang ilihian nga ginapangalanan “GreenPees” ang daw kaangay sa tradisyunal nga talamanan sang bulak bangod sa nagatubo nga tanom sa ibabaw.
Apang kun hemutaran ini sang maayo, makita nga may bukas ini sa isa ka kilid.
Ini naman ang magaserbe nga target zone sang mga magapangihi.
Suno sa imbentor nga si Richard de Vries, ang GreenPee ang ginmanufacture sang Dutch company nga Urban Senses kag may-ara na sang kabug-usan nga 12 nga urinals sa Amsterdam.
Si De Vries ang isa ka environmental psychologist nga nagatrabaho sa kunsilyo sang isa ka pilot project sadtong tuig 2018, nga nakatukod sang GreenPees sa apat ka mga popular nga public urination area sa sentro sang ciudad.
Suno diri, nagresulta ini sa pagnubo sang numero sa nagapangihi kun diin-diin lang sa 50 porsyento.
Bangod sa resulta sang trial, gilayon naman nga nag-order ang mga opisyales sang dugang nga walo ka mga GreenPees nga nakaschedule kuntani nga I deliver sang Pebrero.
Apang naglockdown ang Amsterdam bangod sa COVID-19 pandemic nga nagtuga naman sang pagnubo sang demand sa public toilet.
Tatlo ka semana naman ang nakaligad, liwat nga nagbukas ang ciudad, kasubong man sa pagbukas sang mga bar kag pagbatun sang turista.
Suno kay De Vries, nagdamo pa ang nagakinahanglan sang tiolets.
Paathag naman sini nga kabahin sang benepisyo sang GreenPees ang pagprotekta sa mga historical buildings nga mag gabok tuga sang pagpangihi sa mga pader, kasubong man ang kakini sang paggamit sang tubig kun ikumparar sa iban nga traditional toilets.
Nagadugang man ini sa pagka green sang ciudad.
Indi naman mangin kanugon ang ihi bangod ang GreenPee ang nagaproduce man sang organic fertilizer kag tubig nga magamit sa pagbunyag kag pagpatambok sa mga katanuman sa ciudad.
Magluwas sa manami ini tulukon, mapuslan man ang nasambit nga ilihian.
Manual naman nga ginacheck sang operators ang GreenPee agud nga maseguro kun kinahanglan na ini nga kuhaan sang unod, samtang nagagamit naman ang mga ini sang smart sensor nga magapadala sang signal santo sa website sang kumpanya.
Ginatan-aw nga sunod naman nga pagatun-an kun paano nga makagenerate sang kuryente pinaagi sa pag-ihi sa GreenPees.
