Ginakasubo sang Pinay nga matapos lamang sang ila masadya nga pagselebrar sang New Year sa Las Vegas, Nevada, USA, ini ang nasundan sang paglupok sang isa ka Tesla cybertruck sa atubang sang Trump International Hotel.
Sa interview sang Bombo Radyo Bacolod kay Mate Espina, Bombo International News Correspondent gikan sa California, USA, nakalabay lamang ini sa area antes natabo ang insidente.
Suno diri, sila ang nagdesisyon nga sa Las Vegas magsugata sang bag-ong tuig bangod ini ang isa sa may pinakamatahom nga fire works display sa New Years Eve.
Pahayag ni Espina nga temprano pa sila nagbyahe balik sa California agud indi maipit sa traffic, apang nakagwa lamang sila sa Las Vegas Boulevard sang mabasahan ang report nga may naglupok nga salakyan sa atubang sang Trump tower.
Suno diri, sang aga lamang nakasulod ang salakyan bangod sarado ang bilog nga boulevard kag may ara sang barikada.
Pahayag sini nga tuman ka gutok sa sulod, kag kun tuyo gid sang driver nga makapanghalit sa madamo nga tawo, ini ang indi mahimo sa New Years’ eve celebration bangod hugot ang security kag bisan bag kag glasses ang wala ginapahanugutan nga makasulod sa strip.
Ang New Years’ eve celebration ang gindagsa sang masobra 400,000 nga tawo kun sa diin ang Trump tower ang kalakip sa dalan nga ginasarado bangod malapit lamang diri ang isa sa fireworks display area.
Ginakasubo ni Espina nga matapos sang tuman ka sadya nga okasyon, madamo ang magabugtaw sa kaangay nga balita.
Dugang pa nga antes ang hitabo sa Las Vegas, may nauna na nga insidente sang ginpalupok nga pickup truck sa New Orleans nga ginakabig “act of terrorism”.
Sa impormasyon sini nga nabatun, ginlockdown ang duha ka mga streets samtang nagapadayun ang imbestigasyon.
