Ginalantaw ni Bombo international news correspondent Rosalina Diamante nga magadugay pa ang gyera sa tunga sang Israeli military kag Hamas militants.
Suno kay Bombo international news correspondent Rosalina Diamante, nagahuni ang siren bilang warning sa mga pumuluyo sa tion nga may rocket gani nagapanago sila sa kwarto nga salsalon ang bintana kag pwertahan bangud indi na sila makahingagaw sa elevator bangud yara sila sa 19th floor sang building.
Suno kay Diamante, halos indi sila makatulog kun gab-i bangud nagadalagan sila sa shelter kun maghuni ang siren.
Suno sa OFW, problema sa karon kun maggwa sa building bangud basi may ara sang Hamas militants sa dalan.
Sa 20 ka tuig nga pagtrabaho ni Diamante sa Israel, ini ang una nga kahigayunan nga indi na sila makagwa bangud sang tinalikdan, bisan nagalinupad ang rockets, nagagwa sila gihapon sa building.
Apang bangud yara sa ground na ang Hamas militants, nagapamalay-balay ang mga ini kag nagapamatay sang kutob sang ila makita.
© web photo
Gin-abisuhan naman ang mga residente nga magbakal na nga daan sang pagkaon kag tubig bangud mahimo nga hiluan ang water source kag indi na makainom sa gripo.
Bangud sini, ang amo ni Diamante ang nagbakal na sang dry goods kag nagapanic buying naman ang mga pumuluyo.
Ginalantaw sang Pinay nga magadugay pa ang gyera bangud madamo na ang nagkalamatay apang indi pa kontrolado sang gobyerno ang sitwasyon.
Sa pihak sini, indi pa magpauli sa Pilipinas si Diamante bangud dako ang sweldo sini sa nasambit nga pungsod samtang mabudlay naman mangita sang trabaho sa Pilipinas.
