Ginpakigbahin sang isa ka Pinoy nurse sa United Kingdom ang iya nabatyagan, masobra isa ka semana ang nakaligad halin sang nagpabakuna ini batok sa COVID-19.
Sa interview sang Bombo Radyo Bacolod kay Leo Quijano, wala siya sang may nabatyagan sa una nga adlaw matapos ang iya nga pagpabakuna kag bisan ang dagum ang wala man sini nabatyagan apisar nga nahadlok siya diri.
Suno sa iya, nagbalik pa siya sa trabaho matapos ang iya pagpabakuna kag nagpauli agud magpahuway apang sang nakabugtaw ini sa madason nga adlaw may yara siya sang nabatyagan nga sakit kag mabug-at ang nawala sini nga abaga kun sa diin ang ginturukan sang vaccine.
Nabatyagan man sini ang mga nakasaad sa leaflet nga ginhatag sa ila antes pa sila magpavaccinate kaangay sang daw nahilanat kag nagapalanakit ang lawas.
Apang wala sini ginabasol ang vaccine bangud nakapoy man ini sa iya trabaho nga nagdugang man sa iya nabatyagan.
Nag-inum ini sang paracetamol kag nagpahuway sang duha ka adlaw kag nagmaayo lang man ang iya pamatyag.
Sa karun ika walo na nga adlaw ni Quijano humalin sang ginturukan siya sang vaccine kag aminado ini nga wala na siya sang nabatyagan nga iban nga side effects.
