HOUSTON, TEXAS, USA – Nagpasalamat ang isa ka Pinoy sa Houston, Texas, USA nga isa siya sa maswerte nga nabakunahan sang COVID vaccine nga gindevelop sang Johnson & Johnson vaccine sang Sabado, Marso 15.
Sa interview sang Bombo Radyo Bacolod kay Noor Moraña direkta sa Houston, Texas, nabakunahan na siya sang Johnson & Johnson COVID vaccine apang madamo pa ang nagahulat kag mabudlay man ang magpaschedule.
Santo sa CDC guidelines sa pagpabakuna, ang Phase 1 A ang mga high risk health workers kag first responders; Phase 1 B para sa tanan nga edad nga may underlying conditions; Phase 2 para sa mga manunudlo, school staff kag child care workers, mga homeless ukon grupo sang mga indibidwal nga may disabilities kalakip na ang mental illness kag mga tawo nga nagatrabaho para sa may disabilities kag serious mental illness; kag mga tawo sa prisuhan kag mga nagatrabaho sa jails; kag mga katigulangan nga wala mabakunahan sa Phase 1; samtang ang Phase 3, mga pamantan-on kag mga tawo nga nagatrabaho nga wala malakip sa phase 1 kag phase 2.
Suno kay Moraña, pasalamat siya nga nabakunahan na siya bangud ang iya tiayon ang nagatrabaho sa MD Anderson Cancer Center and Wellness Hospital bilang isa ka OR nurse kag may programa nga vaccine for love ones kun sa diin mahimo bakunahan ang asawa ukon bana sang mga staff sa hospital.
Apang antes pa man siya mabakunahan, makalima na siya ka beses nga nagfollow-up sa iya doctor para sa immunization apang wala man nakahibalo kun san-o maumpisa ang pagbakuna.
Gani tuman gid ang pagpasalamat sini nga nakapabakuna siya paagi sa programa sang ospital nga ginatrabahuan sang iya asawa.
Nagsamo naman ang ginbatyag sini sang ginbakunahan kag wala man siya nakahibalo nga johnson and johnson ang itublok sa iya bangud ulihi naman siya ginhambalan.
Natural lang man suno kay Moraña ang side effects sang bakuna apang nakabatyag man siya sang pag-alangaang apang nadula man gilayon bangud nag-inum siya sang pain killer santo man sa abiso sang doctor.
Apisar nga nabakunahan na, padayon man sa gihapon ang pagsuksok sang facemask sa tion nga maggwa sa tagsa ka pamilya.
Sa karun, nagdangat na sa 37 million ang nabakunahan sa Estados Unidos sa pihak sang mataas nga mortality rate sang pungsod batok sa COVID-19.
Nagpanugyan man ini sa mga Filipino nga patihan ang science bangud ang coronavirus ang matuod kag magsunod sang health protocols batok sa COVID-19.
