Nagpasalig ang pinuno sang Bacolod City Disaster Risk Reduction and Management Office nga gamiton sini ang nakuha nga master’s degree sa Crisis and Disaster Risk Management sa pagbulig sa ciudad.
Sa interview sang Bombo Radyo Bacolod kay Bacolod CDRRMO Head Dr. Ma. Laarni Pornan, nagkuha ini sang master’s degree sa Philippines Public Safety College sa bulig sang scolarship sang Department of the Interior and Local Government (DILG).
Suno diri, indi gid man required ang pag-eskwela sini, apang dako naman nga bulig ang nakuha sini nga kaalam.
Suno pa diri, bilang doctor of medicine kag head sang CDRRMO, sa pagtuon sini mas makahibalo pa gid siya sang mga dapat obrahon.
Aminado man ini nga nabudlayan gid man siya sa pag-umpisa sang pag-eskwela sa pagdungan sang trabaho kag pagtuon apang siya ang suportado sang iya pamilya kag LGU.
Pahayag ni Pornan, sa tion sang katalagman, indi makahambal ang tawo nga dason ukon karon lang ini maggiho bangod dapat subong kag timprano pa magpreparar na.
