Plano sang pinuno sang Bacolod City Police Office nga istoryahon ang mga katapo sang media sa ciudad agud nga mahibaluan kun may yara sila sang nabaton nga pamahog sa kabuhi.
Ini ang kasunod sang pagpatay kay Juan Jumalon ukon Johnny Walker sa sulod sang iya nga studio sa ila nga balay sa Calamba, Misamis Occidental kahapon sang kaagahon kun sa diin live pa nga naga-air sa Facebook ang iya nga programa.
Suno kay Police Col. Noel Alino, kun maistorya niya ang mga katapo sang media kag mahibaluan kun may pamahog ang mga ini nga nabaton sa kabuhi, indi matabo sa Bacolod ang natabo kay Jumalon.
Suno diri, sobra-sobra ang ginhimo sa katapo sang media gani nakabatyag ini sang kaakig sang iya nalantaw ang video.
Suno sa BCPO director, magahimo sila sang intervention kag proactive measures agud nga makapakig-angot sa mga katapo sang media kag may yara sang komunikasyon.
Wala pa man sang media practitioner sa Bacolod nga nagpangayo sang bulig sa BCPO bangud may yara sang pamahog sa kabuhi.
Ginpasalig man sini nga bukas ang linya sang iya nga komunikasyon sa sin-o man nga nagakinahanglan sang bulig bangud sa threat.
