Gin-athag sang pinuno sang Bacolod Traffic Authority Office nga wala sang jurisdiction ang opisina agud nga magdakop sa mga driver sang tricycle nga overloaded.
Sa interview sang Bombo Radyo kay Police Major Junji Liba, igareview pa sini ang angot sa overloading sa tricycle bangud wala ini ginapatuman sang BTAO kag national law ang nagamandu sini.
Suno sa iya, limitado lang ang mapatuman sang BTAO angot sa overloading apang nagasaway sila sa mga driver.
Indi sini matumod ang sitting capacity apang kun tricycle, isa lang dapat ang backrider, duha ang makapungko sa atubang kag duha sa likod ukon maximum nga lima ka pasahero.
Gin-athag sini nga city ordinance kag traffic violations lang ang mapatuman sang BTAO, samtang yara naman sa idalom sang Land Transportation Franchising and Regulatory Board ang overloading.
Suno kay Liba, wala pa nalab-utan sang iya nga pagreview kun may city ordinance ang Bacolod angot sa overloading bangud LTFRB ang may jurisdiction diri.
Aminado naman ini nga ginabawi sang mga driver ang numero sang mga pasahero sang ila nga tricycle kun malayo ang ila destinasyon agud nga makabawi sa income.
Bangud wala sila sang authority nga mag-apprehend ukon mag-issue sang citation ticket, tubtub lang sa pagsaway ang mga traffic enforcers.
Ginakonsiderar naman sini ang pagkampanya batok sa overloading sang mga tricycle.
Gin-ako man sini nga wala na sang traffic enforcers nga pwede madeploy sa malayo nga mga barangay kaangay sang Handumanan kag Felisa bangud kulang ang mga enforcers.
