Nagahulat pa ang pinuno sang Bacolod Traffic Authority Office sang imbitasyon nga magaatubang ini sa session sang Sangguniang Panlungsod angot sa mga traffic ordinance kag implementasyon sini.
Suno kay Police Major Junji Liba, wala pa ini nakabaton sang imbitasyon nagikan sa committee on transportation bisan duha na ka semana ang nakaligad humalin sang ginpahayag ni Councilor Al Victor Espino nga siya ang ipatawag sa regular session in aid of legislation.
Suno diri, ginakalipay niya nga mabatian sang mga konsehal ang iya bahin kag makapresentar man sang suhestyon kun paano mapaayo ang dalagan sang trapiko sa ciudad kag matapna ang mga violators.
Sang iya nabalitaan ang plano ni Espino, nagpreparar na kuntani si Liba sang dapat ipresentar.
Aminado ini nga masako sa karon ang city officials bangud sa State of the City Address ni Mayor Alfredo Benitez bwas nga adlaw gani magahulat lang ini kun san-o ipadala sa iya opisina ang imbitasyon.
Ginpasalig sini nga willing ini nga magpatuman sang mga ordinansa angot sa trapiko kun may yara man sang amendment bangud ini ang husto nga giya para sa mga traffic enforcers.
Nahibaluan nga ginarekomendar ni Liba nga makadihon sang ordinansa angot sa pagbyahe sang e-bike kag e-trike kag padakuan ang multa para sa ila agud nga sila ang madiscourage sa pagbyahe sa national highway.
