Nagpanindugan ang pinuno sang Bacolod Traffic Authority Office (BTAO) nga dako ang nabuhin sa traffic congestion sa Lacson St. apisar sa madamo nga nabaton nga mga reklamo angot sa one way scheme nga ila ginpatuman.
Sa interview sang Bombo Radyo Bacolod kay Police Major Junji Liba, masobra isa ka semana na nga ginapatuman sang BTAO ang one way scheme sa syudad sang Bacolod kag madamo sa gihapon sang nagareklamo apang sa pihak sang reklamo nga nabaton, nabuhinan ang paggutok sang dalan Lacson.
Suno kay Liba, natingala ini nga sang tinalikdan nga semana madamo ini sang nabaton nga reklamo angot sa mga nagacounter flows kag ulihi nalang sini natukiban nga ginakakas ang mga taurpaulines nga ginbutang sang BTAO bilang signages kasunod sang pagpatuman sang one way scheme.
Suno sa BTAO head, tarpaulines ang ginabutang nila sa karun bangud experimental ang ila nga ginapatuman indi pa sila makabutang sang permanente nga signage.
Suno diri, may nadakpan sila sang Miyerkules sang tinalikdan nga semana nga duha ka e-bike driver nga nagamato-mato kakas sang tarpauline agud himuon nga tabon sa ila e-bike.
Sang ginpamangkot sini ang mga nagkaladakpan, ginpahayag lamang nga wala ang mga ini nakahibalo nga kinahanglanon kag ang isa ka alibi nahukas na nga daan kag ginpudyot lamang nila.
Ginpahayag ni Liba nga ang duha ka nadakpan ang ginlaygayan niya nalang anay nga kuntani ginkay-o nalang kun nadagdag ukon nakakas sabaylo nga ginkuha.Suno pa diri, napablotter niya na ang duha ka driver kun sa diin ginhold na ang e-bike kag mahimo sa masunod nga seamana mahatagan sang nagakaigo nga sanctions sa indi maayo nga ginhimo sa propedad sang syudad.
