Aprubado na sang Sangguniang Panlungsod sang Bacolod ang resolusyon nga ginduso sang committee on transportation nga nagahingyo sa pinuno sang Bacolod Traffic Authority Office nga magtambong sa committee conference angot sa mga traffic ordinance sang ciudad.
Ini ang kasunod sang pahayag ni Police Major Junji Liba sa interview sang Bombo Radyo nga kulang ang traffic ordinance sa ciudad angot sa overloading kag luyag man sini nga pataasan ang multa batok sa mga violators.
Ang resolusyon ang gilayon man nga gin-aprubahan sang mga konsehal.
Suno kay Bacolod City Councilor Al Victor Espino, chairperson sang committee on transportation, indi niya mabaton ang pahayag ni Liba sa Bombo Radyo nga indi mapatuman ang pila ka ordinansa bangud kulang-kulang ang provision sini, gani ipatawag niya si Liba.
Suno kay Espino, wala sila sang subpoena powers apang ipton naman nila ang pondo sang BTAO kun indi magtambong si Liba sa committee conference.
Panindugan sang konsehal, indi magpasar ang mga tinalikdan nga city councilors gani luyag niya nga maathagan angot sa pahayag ni Liba.
Suportado naman ni Espino ang plano ni Mayor Alfredo Benitez nga ibutang ang BTAO sa idalom sang Bacolod City government sa baylo nga itugyan ini sa organic personnel sang Philippine National Police.
