Gin-athag sang pinuno sang Bacolod Traffic Authority Office nga wala ini nagkulang sa pagremind sa mga traffic aide nga ipaidalom sa imbentaryo ang mga salakyan sang city government nga yara sa ila custody.
Nahibaluan nga ang salakyan nga naka-memorandum receipt kay Engr. Brian Javellana ang narecover sa sulod sang compound ni Hector Joquino sa Barangay Villamonte sang Huwebes apang guba na ini.
Suno kay Police Major Junji Liba, regular nga traffic aide sa idalom sang Bacolod Traffic Authority Office si Hector Joquino.
Sang ginmandu ni Mayor Alfredo Benitez ang pag-imbentaryo sa mga salakyan sang city government tinalikdan nga tuig, ginrecall man ni Liba ang pila ka motorsiklo nga naka-memorandum receipt sa mga traffic aide, apang wala ini sang ideya nga sa balay ni Joquino ang isa ka van.
Suno kay Liba, pila ka beses ginremind ang mga regular nga traffic aide angot sa mga salakyan sang ciudad nga gin-issue sa ila gani imposible nga wala ini sang ideya nga ginarecall sang city government.
Wala sang ideya si Liba kun pila na ka tuig si Joquino sa serbisyo apang regular na ini sa trabaho.
Suno sa BTAO head, dapat nga magaeksplekar si Joquino kun ngaa yara sa ila balay ang van bangud propiedad ini sang gobyerno.
Sa Lunes, igapatawag ni Liba si Joquino sa isa ka formal meeting agud nga makakuha sang dugang nga detalye, apang igarefer man niya ini sa City Legal Office para sa nagakaigo nga tikang bangud regular ini nga empleyado ang city government
