Aminado ang city director sang Bacolod City Police Office nga very challenging ang mando sang alkalde sang syudad sang Bacolod sa inagurasyon sini sang Hulyo 1 nga sulbaron ang mga nagakatabo nga mga kriminalidad sa syudad sa labing madali nga panahon.
Sa interview sang Bombo Radyo Bacolod kay Police Col. Thomas Joseph Martir, tuman nga pagpanghangkat ang mando sang alkalde apang ginatinguhaan sang mga ini nga masolbar ang mga nagluntad nga shooting incidents.
Suno kay Martir, may yara na sang anom ka napasakaan sang kaso sa mga shooting incidents kag ginatinguhaan nga mapasaka ang kaso sa tatlo ka mga suspetsado subong nga semana.
May yara naman sang isa ka suspek nga nakahunong na matapos nga madakpan sa banwa sang Hinigaran kun sa diin may yara naman ini sang mga warrant of arrest.
Madumduman nga ginmanduan ni Mayor Alfredo Benitez si Martir nga sulbaron ang kriminalidad sa ciudad sa labing madali nga panahon.
Sa inaugural speech ni Benitez, ginpahayag sini nga sang nagliligad nga mga inadlaw, ang Bacolod gin-“terrorize” sang nagluntad nga mga kriminalidad, partikular ang mga shooting incidents.
Suno diri, pabakuron sang iya administrasyon ang law enforcement agencies agud masiguro ang katawhayan sa syudad.
Ginmando ni Benitez kay Police Col. Martir nga pasanyugon ang anti-crime operations kag dugangan ang police patrol kag surveillance sa mga hot spots ukon high-crime areas sa Bacolod.
Suno sa alkalde, committed ang iya administrasyon sa paghatag sang mas daku nga budget sa BCPO kag iya ginalauman nga may yara sang resulta.
Ginpahayag man sang city director sang ginaliwat-liwat sini sa kapulisan sa syudad sang Bacolod nga balikan sang pagserbisyo ang supporta nga ihatag sang alkalde sang syudad.
