Aminado ang Bacolod Traffic Authority Office nga tanan nga asosasyon ang nagaproblema sa colorum nga mga tricycle kag electric tricycle kag indi lang ang Tricycle Operators and Drivers Association of Handumanan.
Sa interview sang Bombo Radyo kay BTAO head Police Major Junji Liba, nagsapol kaina ang Bacolod Traffic Authority Council kag natalakay diri ang pagduging sang colorum nga mga tricycle.
Suno diri, masobra isa na ka bulan ang pag-operate sang Anti-Colorum Task Force kag masobra isa na ka libo ka colorum ang nadakpan.
Aminado si Liba nga indi masakop ang bilog nga Bacolod sa ila nga operasyon gani nagasaylo-saylo sila sang lokasyon.
Nabisitahan naman ang Barangay Handumanan apang nagabalik gihapon ang violators kun magawa nila ang ila nga tricycle.
Suno kay Liba, ang traffic enforcers lang ang ginabantayan sang mga driver sang colorum.
Sa pihak sini, magapadayon gihapon ang BTAO sa pag-operate batok sa ila bangud indi lang TODA Handumanan ang nagaproblema diri kundi tanan nga asosasyon.
May mga tinion naman nga isa ka lane ang ila gina-okupar gani mabudlay sa mga salakyan ang paglabay.
Nagaplano man si Liba nga magbisita sa barangay kag maghingyo sang bulig sang Bacolod Police Station 10 kag sang mga barangay tanod.
