Ginapakamaayo sang pinuno sang Bacolod Traffic Authority Office kun siya ang ipatawag sa session sang Sangguniang Panlungsod agud nga maistoryahan ang tanan nga mga ordinansa may kaangtanan sa trapiko.
Suno kay Police Major Junji Liba, nagahulat lang ini sang imbitasyon nga ma-appear sa session.
Kun siya ang makaatubang sa mga konsehal, makasabat na ini sa mga pamangkot sang Sangguniang Panlungsod.
Makaangkon naman ini sang kahigayunan nga iduso ang revisions sa daan nga mga ordinansa agud nga mapasaka ang multa kag makapasar naman sang ordinansa batok sa pagbyahe sang e-bike bangud indi sila regulated.
Magluwas diri, kinahanglan man suno kay Liba nga iplastar ang loading kag unloading area para sa modernized jeepney ilabi na diri sa city proper.
Suno kay Liba, nakapasa na siya sang proposal para sa loading kag unloading area para sa modernized jeepney apang wala pa ini nadiskusyunan sang maayo.
Gin-ako sini nga madugay na niya kuntani ginalauman nga imbitaron sang City Council gani igalista sini ang tanan niya nga luyag iduso agud nga maplastar sa mga konsehal.
