Nag-apelar ang pinuno sang Bacolod Traffic Authority Office (BTAO) sa mga motorista nga magsunod sa traffic rules agud malikawan ang mga aksidente sa dalanon.
Ini ang kasunod sang aksidente nga nagluntad sa Circumferential Road, Brgy. Alijis, Bacolod City sang Lunes sang kaagahon kun sa diin nadulaan gid sang kabuhi ang isa ka security guard nga nagasakay sa motorsiklo matapos nga nabungguan sang tricycle nga nag-overtake sa isa ka carry nga nagabiyahe padulong sa norte nga direction.
Ginkilala ang biktima kag driver sang motorsiklo kay Lowie Vergara, 41 anyos, residente sang Barangay Handumanan, Bacolod City samtang ang driver sang tricycle amu si John Dayday, 23 anyos, residente sang banwa sang Cauayan.
Sa interview sang Bombo Radyo kay Police Major Junji Liba, santo sa video sa dashcam sang carry, tuman ka dako sang liability sang ginhimo sang tricycle driver bangud dapat kuntani sa natuo nga bahin sang dalan ini nagaagi.
Apisar nga indi ini makalabay sa natuo nga bahin bangud may nagaparking, kuntani naghulat ini kag wala nag-overtake.
Suno kay Liba, kun mag-overtake gid man ang tricycle, dapat doble ang iya kadasigon sa iya gin-overtake-an agud gilayon ini nga makabalik sa iya right of way.
Suno pa diri, bangud nag-overtake na man lang ini, kuntani naghatag siya sang ligwa sa iya nasugata nga motorsiklo apang wala niya ini ginhimo gani sila ang naghead-on collision.
Mas masubo pa suno sa BTAO head bangud ang bayolasyon nga iya ginhimo ang wala nagboomerang sa iya kundi iban nga tawo ang nahalitan.
Kun dako naman nga vehicle ang iya nasugata suno kay Liba, siya ang matam-an.
Suno sa iya, indi “broken line” ang tunga nga linya kag ini ang continuous gani indi pwede mag-overtake.
Samtang may yara naman sang broken line sa natuo nga bahin kag ini ang indicator nga dira lamang sarang makapabilin nga lane.
Kun mag-overtake gid man suno diri, dapat nga iclear anay ang pihak nga side kag sarang na nga makaovertake sa tuo kun clear na ang dalan.
Nagapatigayon naman ang BTAO sang rekoreda kag ginaabisuhan ang mga tricylcle kag slow moving vehicles nga magpabilin sa right lane kag ireserve ang tunga sang dalan sa mga nagadali ukon sa mga fast moving vehicle.
Nagaapelar ini sa publiko nga magsunod gid sa traffic rules agud malikawan ang aksidente bangud ang kabuhi kun madula, indi na mabalik.
