Ginpasiguro sang pinuno sang Coast Guard Station-Negros Occidental nga nakahanda sila sa influx sang mga byahero samtang nagahilapit ang holiday season.
Sa interview sang Bombo Radyo Bacolod kay Commander Ludovico Librilla, ang pinuno sang Coast Guard Station-Negros Occidental, ginpahayag sini nga kaupod sa Coast Guard District Southern Visayas, preparado na sila sa pagdagsa sang mga tawo sa mga pantalan nga magatabok sa Iloilo-Bacolod vice versa.
Suno kay Librilla, naghatag na ini sang direktiba sa mga coast guard substation commander nga magtukod sang help desk ukon passenger assistance center.
Nagpahanumdom man ini sa mga magabiyahe nga dapat kumpleto sa mga dokumento nga kinahanglan sa tagsa ka mga local government unit (LGU) nga padulungan sini.
Magluwas dira, liwat man ini nga nagpanugyan nga magsunod gid sa mga basic health protocols nga ginapatuman agud malikawan ang coronavirus.
