Aminado man si Councilor Cindy Rojas, ang chairman sang Committee on returning residents, nga ginpapauli ang mga nakagraduate nga Locally Stranded Individuals matapos makompleto ang 14 days mandatory quarantine apisar nga wala pa ang mga ini sang resulta sang swab test.
Suno kay Rojas, kun siya lamang ang masunod, indi sini luyag nga magpauli ang mga LSI bangud wala pa ang resulta kag gin-ayo pa sila nga mahimo makatinir isa ukon duha ka adlaw apang gusto na sang mga ini nga makapauli agud makaupod ang tagsa ka pamilya.
Gani nagkonsulta ini kay Vice Mayor El Cid Familiaran bilang chairman sang Inter Agency Task Force kag City Health Officer Dr. Maria Carmela Gensoli kag gin-abisuhan man nga mahimo na makapauli ang LSIs bangud nakompleto na ang 14 days mandatory quarantine sang mga ini.
Apang kinahanglanon nga magpabilin nga yara sa idalom sang istrikto nga home quarantine samtang ginahulat pa nga ipadala sang Department of Health Region 6 ang resulta sang test.
Suno diri, nadelay ang lab test results matapos maaberya ang system sang tinalikdan nga semana.
Suno sa konsehal, may nagsunod man sa panugyan apang may yara sang isa nga wala nagsunod kag ini ang Patient number 19 nga nagpositibo sa Covid-19 kun sa diin nag-inom na ini upod ang mga abyan.
Suno kay Rojas, bangud sa ginhimo sini nahalitan pa ang iban nga katapo sang pamilya kag abyan bangud ginkordon ang bilog nga compound kag nalakip na ang balay sang trisikad driver nga ginsakyan sini agud monitoron kun magpakita sang sintomas sang nasambit nga balatian.
