Ginkalipay sang chairman sang Committee on Tourism sa Sangguniang Panlungsod ang successful nga pagpatigayon sang Masskara Festival 2023 humalin sang Oktubre 6 tubtob kahapon, Oktubre 22.
Sa interview sang Bombo Radyo kay Councilor Jason Villarosa, ‘very succesful’ ang ginpatigayon nga Masskara Street and Dance Competition sa ulihi nga adlaw sang selebrasyon sang Masskara.
Suno diri, napuno ang Paglaum stadium sang mga tumalan-aw kag nakita sini mismo nga nag-enjoy ang tanan nga nagtambong sa kompetisyon.
Iya man ginkalipay ang pag-bisita sang mga foreign tourist ilabi na nga madamo diri ang subong pa lang naka-eksperyensya sang Masskara Festival.
Nakilala man sini ang mga bisita nagikan sa luas sang pungsod kaangay sang New York kag Los Angeles.
Sa karun, liwat naman nga nakabaton ang ciudad sang imbitasyon nagikan sa iban nga pungsod lakip na diri ang Canada kag South Korea para sa presenysa sang Masskara Dancers.
Samtang, kahapon nakuha sang Barangay Granada ang Championship sa Masskara Street Dance and Arena Competition 2023 apang aminado si Villarosa nga madamo sang naggwa nga opinyon sa natabo nga kompetisyon samtang suno naman kay Bacolod City Mayor Alfredo Albee Benitez, nga luyag sini magkuha sang judge gikan sa luwas sang pungsod para sa masunod nga Masskara Festival 2024.
Pahayag ni Villarosa bisan pa nagnubo sa tatlo ka semana ang selebrasyon sang Masskara Festival, yara sa gihapon ang kalidad sa performance kag events kun sa diin ang target sang alkalde nga makita ang isa ka world class event kag performance sa Masskara Festival. Samtang…ginpahayag sang chairman sang Committee on Tourism sa Sangguniang Panlungsod sang ciudad sang Bacolod nga ang madaog sa Street Dance and Arena Competition sa subong nga MassKara Festival ang una nga hatagan sang prayoridad agud nga mangin tiglawas sang ciudad sang Bacolod sa iban nga pungsod agud nga magpasundayag.
Suno kay Villarosa, ginakalipay sini nga positibo ang mga reaksyon sang mga turista ilabi na ang mga foreign tourists nga first time nakaeksperyensya sang pagselebrar sang Masskara Festival.
Suno kay Villarosa, ang Masskara Festival ang indi lang kilala sa pungsod Pilipinas bangud ini ang nakilala na sa pila ka bahin sang kalibutan bangud pila sa mga nakilala sini nga mga turista amo ang isa ka American nga nagpahayag nga first time sini nga maglantaw kag magselebrar sang MassKara Festival kag nagmuno ini nga nalipay gid siya nga maeksperyensyahan ang nasambit nga festival.
Pila sa mga ginkalingaw sang mga turista amo ang electric MassKara dancers.
Ginpahayag man ni Villarosa nga bangud sa road show nga ginpatigayon nila sa New York kag Los Angeles sang tinalikdan nga Hunyo kaupod ang MassKara dancers, may yara sang nagpadulong sa ciudad sang Bacolod nga masobra 20 ka mga turista nagikan sa Los Angeles, California.
Suno kay Villarosa, una naman sila nakabaton sang imbetasyon ang ciudad sang Bacolod nagikan sang Milan, Italy kun sa diin ang champion sa Street Dance And Are Competition sa Masskara 2023 ang dal on sang ciudad didto agud nga magperform.
