Gin-athag sang pinuno sang consumer integrated service division sang Central Negros Electric Cooperative (Ceneco) ang mga nag-attributes sa pagsaka sa rate sang kuryente.
Sa interview sang Bombo Radyo Bacolod kay Unice Pasaylo-Castillon, ang nag-attributes sa pagsaka sang sukot sa kuryente amo ang generation, transmission kag system loss charges nga tuga sang pagsaka sang PCPC fuel rate nagikan P6.4963 nga nangin P8.0841, pagsaka sang power cost kag iban nga pa nga pass through charges.
Suno kay Castillon, ang Ceneco ang nagakolekta lamang kun ano ang kinahanglan nga kolektahon.
Suno diri ang generation charges ang kinahanglan nga mabayaran agud nga magpadayon ang pagsupply sang kuryente samtang ang transmission naman ang kinahanglan man bayaran bangud diri naga-agi ang kuryente padulong sa Ceneco.
Magluwas sang generation kag transmission cost may yara pa sang system loss charges nga ginabayaran ang mga konsumidor.
Suno kay Castillon, may yara sang technical kag non technical system loss.
Ang technical ang may yara sang limit kag ang sobra ang ginabayran sang Ceneco samtang ang non technical ang ginalakipan sang hungod nga pagpangawat sang kuryente.
Ginpahayag man ni Castillon nga delikado ang pagpangawat sang kuryente gani ginadiscourage gid ang paghimo sini.
Ginsapol naman sang Ceneco ang mga punong barangay angot sa natukiban nga mga unmetered street lights nga nagadugang man sa balayran sang mga konsumidor.
