Gindismiss sa serbisyo ang pinuno sang Department of Public Services sang ciudad sang Bacolod bangud sa 9 counts of grave misconduct kag gross neglect of duty.
Suno kay Bacolod City Legal Officer Atty. Romeo Carlos Ting, si Ramel Palalon ang nagapangatubang sang nasambit nga kaso administratibo bangud siyam ka fuel receipts ang iya ginpirmahan para sa bulldozer nga wala naman ginagamit nga nagabalor sang P50,000.
Magluwas sa 9 counts of grave misconduct, nagapangatubang man ini sang gross neglect of duty.
Kun madumduman, sang bulan sang Nobyembre, gindagdagan si Palalon sang 90-day suspension without pay bangud sa irregular nga paggamit sang bulldozer, kaupod ang driver nga si Darwin Cardones.
Sang Abril 27, ginpapanaog ni Mayor Alfredo Benitez ang order angot sa dismissal ni Palalon sa serbisyo.
Si Cardones naman ang gindagdagan sang anom ka bulan nga suspension bangud sa simple neglect of duty bangud ginpanindugan sini nga nagapirma siya sa trip ticket nga wala niya nabasa bangud ginpapirmahan man ini sa iya.
Suno kay Ting, nagfile si Cardones sang motion for reconsideration gani igaresolve pa nila kun san-o ini iserbe sa iya.
Ang order naman kay Palalon ang executory apang sarang pa ini makafile sang appeal sa Civil Service Commission.
Sa karon, nagapungko si Ma. Fe Tresfuentes bilang OIC sang DPS.
