Ginkumpirmar sang pinuno sang Division Public Affairs Office (DPAO) sang 3rd Infantry Division sang Philippine Army nga engkwentro ang nagluntad sa tunga sang 79th Infantry Battalion sang Philippine Army batok sa gina-alegar New People’s Army sang Martes sang hapon sa Sitio Nabalas, Barangay Canlusong, banwa sang E.B Magalona, Negros Occidental.
Sa interview sang Bombo Radyo Bacolod kay Lt. Col. J-Jay Javines, antes ang nagluntad ang engkwentro, may yara sang nabaton nga impormasyon ang tropa sang 79th Infantry Battalion nga may yara sang presensya sang armado nga grupo sa nasambit nga lugar kun sa diin ginrespondehan sang mga suldado kag nagluntad ang pagbaluhanay sang lupok matapos nga nagsugataay ang armado nga grupo kag ang nagresponde nga tropa sang 79th IB.
Nahibaluan naglawig sa 15 minutos ang engkwnetro kun sa diin duha ang patay sa bahin sang NPA kag wala naman sang kaswalidad sa bahin sang Philippine Army.
Ginkilala ang mga napatay nga sanday Christian Vargas kag Mylene Salgado.
Narekober sa mag-asawa ang duha ka M16 rifles, M14 rifles, kag mga bandoliers, AR15 rifle, Garand rifle, apat ka rifle grenade, mga bala, mga personal nga gamit kag mga dokyumento.
Suno sa pinuno sang 3rd Infantry Division Public Affairs Office (DPAO) nga yara sa ila nga record nga katapo sang NPA sanday Vargas kag Salgado.
Suno diri, santo sa ila nga impormasyon, si Salgado ang tumandok sang Barangay Buenavista, ciudad sang Himamaylan kag ginpadala sang grupo sang NPA sa Barangay Canlusong agud nga marecover ang nadismantle na nga Northern Negros Front, Komiteng Rehiyon – Negros, Cebu, Bohol, Siquijor sa lugar.
Ginpahayag man sini nga ang amay ni Christian Vargas nga si Arlo Vargas ang mataas nga opisyal sang NPA kag may yara sang patong P550,000.00.
Suno diri, indi man matuod ang alegasyon nga may raid nga natabo bangud natabuan lamang nga may yara sang balay sa ginluntaran sang engkwentro.
