Naghatag sang pahanumdom ang Explosive Ordnance Disposal (EOD) and Canine Unit sang Bacolod City Police Office sa karun nga yuletide season kasunod sang pagdagsa sang mga tawo.
Sa interview sang Bombo Radyo kay PLt Alberto Sardua Jr, head sang EOD and canine unit sang BCPO, kun may yara sang mga unattended nga baggage nga ginbilin lang sa mga lugar indi dapat pagbilinan, indi ini pagtandugon bangod mahimo nga may yara sang mga explosive device nga magalupok sa tion nga matandog.
Kun kaisa ang mga ginabilin nga gamit amo ang bag, karton, plastic bag kag kun kaisa basura.
Kun may yara sang makita nga mga suspicious nga gamit mas maayo nga ini ang ireport sa kapulisan agud mahilway ang kaugalingon, ang mga tawo sa palibot kag ang propedad.
Pahayag ni Sardua, ginatun-an man sang mga suspetsado ang ila nga himu-on nga krimen, kaangay na lamang kun ano nga oras naga-operate ang area ukon ano nga oras nagadamo ang mga tawo sa lugar.
Dugang pa ni Sardua, sila nagabantay gid sa mga bus terminal, airport, seaports kag sa mga area sa ciudad nga may madamo sang tawo.
Pahanumdom sini, magulu-aligmat sa palibot kag indi magkumpyansa para sa safety indi lang sa kaugalingon apang lakip na ang mga tawo sa palibot.
