THAILAND—Ginpasiguro sang pinuno sang Filipino Community sa Thailand nga yara sa maayo nga kahimtangan ang mga overseas Filipino workers (OFWs) sa tunga tunga sang mga hublag-protesta nga nagaluntad sa amo nga pungsod.
Nahibaluan nga tatlo ka bulan na nga nagahublag-protesta sa Bangkok agud ipanawagan ang pagbuya sa puwesto ni Prime Minister Prayuth Chan-ocha.
Sa interview sang Bombo Radyo Bacolod kay Bombo International Correspondent Roseminda Duque-Timbreza direkta sa Thailand, ginpahayag sini nga nagpagwa sang advisory ang embahada sang Pilipinas sa amo nga pungsod nga nagapanugyan sa mga OFWs nga likawan ang pag-intra sa mga hublag-protesta ukon magpakigbahin sa mga political groups.
Nagapang-abiso man ang embahada nga mag-obra lamang sang ila nga trabaho kag indi na magpanghilabot pa.
Ginpasiguro man ni Timbreza nga apisar sa nagakatabo nga mga pag-rally, indi man apektado ang ila nga trabaho.
Nahibaluan nga madamo sang mga Pilipino ang nagatrabaho sa Thailand ilabi na sa patag sang pagtudlo.
