Ginakabig nga maayo nga balita sang pinuno sang Inter-Agency Task Force (IATF) sang syudad sang Bacolod ang rekomendasyon sang national Inter-Agency Task Force nga ipaidalom ang syudad sa general community quarantine (GCQ) sumugod Oktubre 01, 2020.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga ang tanan nga Local Government Unit (LGU) ang nagasunod lamang sa mando sang national government kag una naman nga nag-apelar si Bacolod City Mayor Evelio “ Bing” Leonardia nga ipaidalom sa GCQ ang syudad bangud nakita sini nga naganubo man ang kaso sang COVID-19.
Suno kay Familiaran, santo sa GCQ omnibus guidelines nga ginpapanaug sang national IATF, sarang na nga makabalik ang public transportation apang ang mga parlors kag bars ang wala pa ginapahanugutan.
Apang suno sa iya, pahat-pahaton man ini sa ipagwa nga Executive Order sang alkalde.
Samtang, nagpanawagan man ini sang disiplina sa mga pumuluyo sa pagsunod sa mga basic health protocols agud nga magpadayon nga magnubo ang kaso sang COVID-19 kag indi magpati sa mga ginapost sa social media nga wala sang pulos ang pagsuksok sang facemask kag faceshield.
Nagalaom man ini nga magapadayon ang pagnubo sang Covid positive sa syudad bangud sa karun eratic pa ang status sang COVID cases.
Ginpahayag man ni Familiaran nga wala sang backlog ang contact tracing sang syudad.
Natumod naman kag naisolate ang mga positive cases sang COVID-19.
