Ginkumpirmar sang presidente sang Bacolod Alliance of Commuters, Operators and Drivers (BACOD) nga may natalana na nga conference sa tunga nanday Transportation Franchising and Regulatory Board (LTFRB) chief Teofilo Guadiz III, Malayang Alyansa ng Bus Employees at Laborers (MANIBELA) Chairman Mar Valbuena kag Pinagkaisang Samahan ng mga Tsuper at Operators Nationwide (PISTON) President Mody Floranda.
Ini kasunod sa ginpatigayon nga nationwide transport strike sang duha ka national transport group nga gin-updan man sang ila mga affiliated nga mga grupo sa nanarisari nga bahin sang Pilipinas, kaangay na lamang sang BACOD nga yara sa idalum sang MANIBELA.
Suno kay Catedral, panawagan lamang sang mga ini nga ma-extend ang ila prangkisa matapos ang Desyembre 31 nga consolidation deadline.
Paathag sini nga sila ang wala nagalagas sang lima ka tuig nga prangkisa kundi bisan isa lamang ka tuig nga extension, bangod nagapati ang mga ini nga sarang pa mahitso ang kasugtanan sa nasambitan nga tuig.
Nagalaom ang BACOD nga pamatian sang National Government ang hingyo sang mga transport leaders, nga mapahanugutan sa pagbyahe sa masunod nga tuig, apisar nga indi magsulod sa consolidation process.
