Nagpasalamat ang pila sa mga transport group nga bisan paano ginapamatian sang Bacolod City Government ang ila nga mga concerns may kaangtanan sa jeepney modernization program.
Sa interview sang Bombo Radyo Bacolod kay Lilian Sembrano, elected- president sang Bacolod Alliance For Commuters Operators & Driver’s Incorporated (BACOD), sa ginpatigayon nila nga rally protesta kahapon, nag-atubang man sa ila si Bacolod City Vice Mayor kag acting Mayor El Cid Familiaran kag ginpasalamatan sini nga ginpamatian man sila sang nagpaathag sila kun gid ang matuod nga sitwasyon sang jeepney modernization program kag kun ano man ang yara sa likod sini.
Suno kay Sembrano, ginplastar man nila sa bise alkalde kun pila ang apektado sa pagpatuman sang gobyerno sang nasambit nga programa.
Isa man sa ginpaathag sang mga ini ang ila nga rason sa indi pag-upod sa consolidation bangud man may yara man sila sang mabug-at nga basehan sa pagsulod sa kooperatiba.
Ginpahayag man nga nakita man sang bise alkalde kun pila ang maapektuhan sang nasambit nga programa.
Nagaapelar man ang mga ini sa city government nga magpatawag sang public consultation sa tanan nga mga stakeholders kaupod ang Land Transportation Franchising and Regulatory Board agud nga mahibaluan ang panan-awan sang mga ini sa jeepney modernization program.
Nakahibalo man ini nga ginpahanugutan ang mga traditional jeepneys nga makabiyahe tubtob sa Enero 31, 2024 apang suno diri ang extension ang agud mahatagan ligwa ang mga wala pa nakasulod sa consolidation nga mapaconsolidate na.
Bangud sini nagapanawagan siya sa mga unconsolidated nga jeepney drivers and operators nga indi magpaconsolidate kag manindugan sila nga indi kinahanglan nga magsulod sa kooperatiba.
Ginapanawagan man nila nga ibalik ang lima katuig nga validity sang ila nga prangkisa.
