Wala nagapati ang bag-o nga commander sang 303rd Infantry Brigade (IB) sang Philippine Army nga batunon sang Communist Party of the Philippines (CPP) ang liwat nga pagtanyag ni Presidente Rodrigo Duterte sang peace talks sa mga ini.
Suno kay Colonel Inocencio Pasaporte, indi man peace talks ang isyu sang CPP kundi politika bangud luyag sang mga ini nga itake-over ang gobyerno.
Dugang pa sini nga tubtob subong, wala man sa gihapon nagbiya ang mga komunista sa ila armado nga pagpakigbato.
Apang sang damlag lang ginpahayag ni Labor Secretary Silvestre Bello III nga nagpasugot na ang mga lider sang CPP sa 90% sang mga luyag ni Presidente Rodrigo Duterte para sa pagpanumbalik sang peace talks.
Sang Disyembre 6, nagpadulong si Bello sa The Netherlands kag naistorya sini si CPP founding chairman Jose Maria Sison kag National Democratic Front (NDF) senior adviser Luis Jalandoni.
Samtang nagapati si Inocencio nga indi na makusog ang pwersa sang New People’s Army (NPA) sa Negros Occidental.
Suno diri, kalabanan sang mga miembro sang NPA sa karun ang mga kabataan na lang.
Kadungan sini, ang pagpanawagan ni Inocencio sa NPA nga himuon nga kahigayunan ang Paskwa nga magbalik na sa sabak sang gobyerno kag magpauli sa ila mga pamilya.
Suno sa army commander, dapat magkaupod ang magpamilya sa adlaw sang Paskwa.
