Nagakalipay ang pinuno sang Provincial Environment and Natural Resources Office (PENRO) sa Negros Occidental nga may yara na sang direktiba sa pagdumili sang single-use platics sa mga opisina sang gobyerno.
Suno kay PENRO Officer Edgardo Rostata, nalipay sila sa sini nga mando bangud sa ila mismo nga opisina, may yara man siya sang direktiba sa iya mga personnel nga idumili man ang paggamit sang plastic.
Gina-encourage niya ang iya mga personnel nga magdala sang kaugalingon nga baso ukon tumbler agud indi na sila maggamit sang plastic cups sa pag-inom sang tubig.
Mas maayo pa gid suno kay Rostata nga ang pagdumili sang single-use plastic ang dal-on sang tanan nga ahensiya sang gobyerno sa ila nga mga information campaign.
Madumduman nga nagligad nga Pebrero 12 sang ginpirmahan ni Department of Environment and Natural Resources (DENR) Secretary Roy Cimatu, chairman sang National Solid Waste Management Commission (NSWMC) ang Resolution No. 1363, Series of 2020.
Ini ang nagamando sa DENR nga magpreparar kag mag-implementar sa pagdumili sang paggamit sang “unnecessary” single-use plastic products sa national government agencies, local government units (LGUs), kag iban pa nga government-controlled offices.
Sakop sa ban ang mga plastic products nga manubo sa 0.2 millimeter ang kadamulon kaangay sang drinking straws, coffee stirrers, spoons, forks, knives, “labo” ukon thin and translucent plastic bags, kag thin-filmed sando bags nga manubo sa 15 microns.
Suno kay Cimatu, ang nasambit nga resolution ang isa sa mga dako nga tikang agud buhinan ang single-use plastics nga naga-pollute sang waterways, kag nagapatay sang marine life kag nagadugang pa sa nagasaka nga solid waste sang pungsod.
