Gin-athag sang pinuno sa Public Order and Safety Office (POSO) nga ang pagresign sini sa pwesto ang bangod sa health reason kag wala sang koneksyon sa nagluntad nga riot nga nagtuga sang kamatayon sang 15 anyos nga lalaki sa ground sang Bacolod City Government Center (BCGC) sang Domingo sang gab-i.
Suno kay POSO head retired P/Col Celestino Guarra, Mayo 11 palang sang nagfile ini sang resignation kag ini ang matapos na sa iya nga pagserbisyo effective subong nga adlaw.
Si Guarra ang gin-appoint ni Bacolod City Mayor Evelio “Bing” Leonardia bilang POSO Head sang 2016.
Ang POSO personnel amo ang incharge sa seguridad sa sulod kag palibot sang Bacolod City Government Center.
Paathag sini nga wala sang kahilabtanan ang resignation sini sa nagluntad nga kinagamo bangod antes paman ini matabo nakafile na siya sang resignation kag nagdugay lang antes natapos ang iya pagserbisyo bangod sa pila ka mga rekisitos.
Kadungan sini, bangod siya ang appointee sang administrasyon ni Leonardia, ginalauman naman nga magtakop ang orihinal sini nga pagserbisyo sa Hunyo 30, sa pagpungko sang Benitez administration.
Suno kay Guarra, health reason ang kabangdanan kun ngaa siya ang nagresign ilabi na nga kinahanglan sini nga magpabulong kag indi kaangay sa nagalapta nga pato-pato sa iya.
Pahayag sini nga ginwaragwag sa kahanginan nga ini ang nagresign sa pwesto bangod nahadlok matapos nga nagluntad ang riot sang mga kabataan sang Dominggo sa BCGC ground.
Suno diri, siya ang retirado nga pulis gani wala ini nahadlok sa kaangay nga mga hitabo.
