Ginaduso sang transport group nga PISTON ang pagsuspende sa excise tax sa produktong petrolyo sa panindugan nga indi lang ini ang ginakuhaan sang buwis sang gobyerno.
Suno kay Modesto Floranda, national president sang PISTON, nga ginapanindugan sang gobyerno nga indi pwede mapalos ang excise tax bangod madulaan man sang pondo ang iban nga mga proyekto kag programa sang national government.
Apang suno diri, indi lang ang excise tax ang ginakuhaan sang buwis bangod madamo pa sang iban nga mga layi nga makahatag sang revenue sa Pilipinas.
Dugang pa ni Floranda nga madamo sang mga dalagko nga negosyante nga dapat lagson ang gobyerno nga wala nagabayad sang tax.
Pahayag sang PISTON nga sa nagakatabo, ang mga pumuluyo nga haluson lang ginagamit sa panginahanglanon ang kita amo ang naga-agunto bangod sa pagsaka sa presyo sang gatong.
Dugang pa sang mga ini nga karun nga may-ara sang COVID-19 pandemic, mas indi nagid makabangon ang mga pumuluyo.
Panindugan sang PISTON nga ang mahimo nalang sang gobyerno agud mabuhinan ang gutom nga ginabatyag sang mga Pilipino amo ang pagsuspende sa excise tax samtang gina-estoryahan pa ang provision sa Oil Deregulation Law.
Suno kay Floranda, indi lang ang transport sector bangod bisan ang mga mamalidha, kongresista kag senador kasubong man ang Department of Energy (DOE) ang nagapanawagan naman nga amyendahan ang Oil Deregulation Law.
Suno sa Presidente sang PISTON, nga bangod sa layi nagakadulaan na sang otoridad kag gahom ang gobyerno nga mapunggan ang presyo sang gatong.
