Nagalaom ang National President sa Pagkakaisa ng mga Samahan ng Tsuper at Operator Nationwide (PISTON) nga mapadali ang pagpagwa sang Korte Suprema sang Temporary Restraining Order (TRO) sa franchise consolidation requirement sang Public utility Vehicle (PUV) modernization program.
Sa interview sang Bombo Radyo Bacolod kay Modesto “Mody” Floranda, nagfile ini sang petition sa Korte Suprema agud indi madayun ang consolidation deadline nga Desyembre 31, 2023, kun sa diin indi na makarenew sang prangkisa ang mga traditional jeepney drivers kag operators nga wala nagsulod modernization program sa masunod nga tuig.
Panindugan ni Floranda nga indi lehitimo nga layi ang PUV modernization kag ini ang Executive Order lamang gani ang pagpilit sa ila sa consolidation ang pagbayolar man sa ila constitutional rights sa ‘freedom of association’.
Pahayag sini nga ginapwersa sang Land Transportation Franchising and Regulatory Board (LTFRB) kag Department of Transportation (DOTr) ang mga drivers kag operators pinaagi sa mga ginapagwa nila nga executive orders.
Suno diri, sa consolidation process, ang kooperatiba na amo ang magakapot sang prangkisa sang mga salakyan kag indi na ang mismo nga driver ukon operator.
Suportado man sang mga ini ang modernization program apang indi sila kumpormi nga mga foreign suppliers ang nagamonopolya sang mga korporasyon kag kooperatiba nga nagapatay sa lokal nga ekonomiya.
Dugang pa sini nga ang consolidation ang katumbas naman sang pagphase out sa mga traditional jeepneys.
Panindugan pa sini nga kun luyag lamang sang gobyerno nga makay-o ang mode of transportation, kuntani ang pungsod na mismo ang naghimo sang public transportation kag indi nga ginasalig sa mga foreign investors.
Suno kay Floranda makatuga sang transport disaster sa masunod nga tuig ang programa bangod sa data sang LTFRB, 25 porsyento pa lamang ang mga traditional jeepney drivers kag operators nga nakacomply sa modernization program sa National Capital Region (NCR).
Panindugan sini nga ang tinutuyo sang PISTON amo nga makahatag sang mas maayo kag mas barato nga serbisyo para sa mga Pilipino.
