Pito ka mga firecracker injuries ang narekord sang Bacolod City Police Office humalin Disyembre 25, 2021 tubtob Enero 1, 2022.
Sa interview sang Bombo Radyo kay BCPO Director Police Col. Thomas Joseph Martir, minor injuries lamang ang mga narekord nga insidente kag kalabanan diri ang mga menor-de-edad.
Suno sa iya, ini bangud may mga kabataan nga mga nagapamudyot sang mga firecrackers sa dalan nga wala naglupok.
Wala man sang may narekord nga nag-indiscriminate firing kag wala man sang may naigo sang stray bullets.
Suno kay Martir, tuman lamang ka gamay sang mga firecracker incidents sang 2021 kun ikumparar sang 2020 bangud sa nagapadayon nga information dissemination sang Department of Health kag Philippine National Police.
Nagapasalamat man ini sa mga kapulisan nga nagbantay kag nagpanakop sang mga nagapalupok sa sagwa sang firecracker zone bangud nangin epektibo ang ila enforcement.
