Wala sa gihapon sang identity ang pito ka gina-alegar katapo sang New People’s Army (NPA) ang napatay sa engkwentro batok sa militar sa Barangay Gatuslao, Candoni, Negros Occidental, alas-3:40 kahapon sang kaagahon.
Sa interview sang Bombo Radyo Bacolod kay Police Major Nelson Amsiwen, hepe sang Candoni Municipal Police Station, kasunod sa impormasyon sang mga lokal nga residente nga may yara sang presensya sang dismantled nga grupo sang South West Front (SWF), Komiteng Rehiyon-Negros, Cebu, Bohol, Siquijor (KR-NCBS) sa Barangay.
Nagpatigayon sang combat operations ang 47th kag 15th Infantry Battalions sang Philippine Army kag amo na nga nagluntad ang engkwentro nga nagresulta sa pagkapatay sang pito ka gina-alegar nga NPA.
Suno diri, anum ka bangkay ang una nga narekober sa encounter site kag isa ang yara sa kritikal nga kondisyon.
Gintinguhaan pa nga hatagan sang nagakaigo nga pagbulong ang isa apang ini man ang ginbawian sang kabuhi samtang nagabyahe.
Lunsay mga lalaki ang nagkalamatay kag yara sa 20 tubtob 40 anyos nga tubtob sa karun wala sang identity.
Samtang, may narekober man nga high-powered firearms nga ginalakipan sang lima ka M16 rifles, duha ka AK-47 rifles, kag isa ka M653 rifle samtang wala sang mga dokumento nga narekober nga makabulig sa identity sang pito.
Panawagan ni Amsiwen nga kun sin-o man ang luyag nga magkumpirmar sa identity sang mga napatay, magapalapit lamang sa ila nga estasyon.
Samtang, plano na lamang nga ilubong ang pito ka napatay kun wala sang may magpalapit para mag-claim sa mga ini.
Sa interview sang Bombo Radyo kay June Calidgid, parish priest sang Our Lady of Lourdes Parish Church, kun wala sang may claim sa mga bangkay pagahatagan na lamang sini sang basbas ang mga napatay agud nga mahatagan sang desente nga paglubong.
