Pito ka mga balay sa anom ka mga purok sa Barangay Taculing, Bacolod City ang ginseal off matapos magpositibo sa coronavirus disease ang tagbalay.
Sa interview sang Bombo Radyo Bacolod kay Punong Barangay Lady Gles Gonzales Pallen, nagpatigayon sila sang house seal-off kasunod sang resulta sang COVID test.
Ini ang ginalakipan sang tag-isa ka balay sa Purok Sta. Lucia; Purok Cosmos; kag Purok Kabukiran kun sa diin may kompirmado nga nagtaliwan nga 79 anyos nga lalaki sang Biyernes bangud sa balatian.
Ginseal-off man ang isa ka balay sa Purok Kawilihan samtang duha naman ka balay sa Purok Lerio.
May yara man sila sang ginseal-off nga isa ka balay sa Puentebella subdivision apisar nga indi pa kompirmado nga positibo ini sa balatian.
Suno kay Pallen, kinahanglan nga makatapos sang 14 days quarantine ang mga kompirmado nga kaso sang Covid-19.
Nahatagan naman sang food packs kag water assistance ang mga apektado nga residente.
Samtang, nagdangat naman sa 18 ang kaso sang COVID 19 sa Barangay 18, ciudad sang Bacolod.
Sa impormasyon nga nakuha sang Bombo Radyo, nalatnan ni Patient 6 nga isa ka nurse ang apat ka mga pamilya kag isa ka messenger sang Hall of Justice nga kaupod niya sa ginaarkilahan nga balay.
Natalnan naman ni Patient 2 nga manunudlo sa pribado nga unibersidad si Patient 8 kag Patient 17 bangud isa lang ka balay ang ila ginatiniran.
Sanday Patient 7, 9, 10, 11 kag 18 naman ang isa man ka pamilya nga nagaistar sa isa ka balay.
