Pito ang pilason matapos nahulog ang Mitsubishi Canter truck sa pil-as sa Purok Talus, Barangay Pandanon, banwa sang Salvador Benedicto, Negros Occidental kahapon.
Sa interview sang Bombo Radyo Bacolod kay Police Major Eugene Tolentino, hepe sang Salvador Benedicto Municipal Police Station, may pito ka tawo nga sakay sa canter truck nga ginalakipan sang lima ka lalaki kag duha ka babayi.
Halin sa syudad sang Bacolod padulong sa Negros Oriental kag magahapit sa syudad sang San Carlos ang canter truck nga may karga nga pito ka tonelada sang bombay kag pag-abot sini sa nasambit nga lugar nadulaan ini sang preno rason nga nag-overshoot ini sa pil-as nga may kataason nga kapin 20 tubtob 25 metros.
Suno sa hepe, ang canter truck ang nagikan man sa Occidental Mindoro nga nagtabok padulong sa Bacolod agud nga magdeliver sang bombay sa San Carlos, Negros Occidental kag magapadulong man sa Negros Oriental.
Nakaangkon sang mga samad sa nagkalain-lain nga lawas ang mga pasahero kun sa diin ang tatlo sa pito ang nakaangkon sang patal nga pilas samtang ang apat ang nakaangkon naman sang minor injuries.
Ang mga biktima ang ginkilala nga sanday Robwell Barientos, 44 anyos, kasado; Diego Trinidad, 20 anyos, single; Marilyn Cosme, 52 anyos, kasado, Mark Anthony Trinidad, 23 anyos, single, Junjun Cruz, 23 anyos kag lunsay mga residente sang Occidental Mindoro samtang ang duha naman nga sanday Third Moncatar, kag Sabar Moncatar, ang lunsay mga residente sang syudad sang Bacolod.
Ginahulat pa ang latest medical bulletin sang mga biktima kag ginatinguhaan nga macontact man ang ila nga mga pamilya agud mapahibalo man sa natabo sa mga ini.
