Gilayon nga ginpahalin sa serbisyo ang pito ka mga traffic enforcers sang Silay City nga nagpositibo sa illegal drug use sa surprise drug test nga ginpatigayon sang Lunes, Hulyo 10.
Ang surprise drug test ang gindihon sang Silay City Police Station kag Philippine Drug Enforcement Agency (PDEA) Region 6.
Sa interview sang Bombo Radyo kay Silay City Mayor Joedith Gallego, gilayon ini nga nagmando nga kakason ang pito ka enforcers sa trabaho.
Ang pito ang mga bag-o nga mga gin-hire kasunod sang pagpungko sini bilang alkalde sang ciudad.
Kasunod sa kampanya sini batok sa illegal nga druga, indi lamang sa mga traffic enforcers ang ginpatigayonan sang drug test apang kahapon nagpatigayon man ini sang drug test sa kapin 500 ka mga empleyado nagikan sa nagkalain-lain nga departamento sang City Hall kag sa karun ginahulat na lang ang resulta sini.
Mensahe sini sa mga may trabaho ukon wala man, magbuligay sa kampanya batok sa illegal nga druga nga makaapekto sa safety sang pamilya kag sa mga tawo sa palibot.
