Pagahatagan sang ciudad sang Bacolod sang temporaryo nga matiniran ang pito ka mga pamilya nga nagatinir sa idalom sang taytay sa Lupit Bridge.
Nahibaluan nga gin-anod sang tubig sa suba ang dako nga bahin sang hayob-hayob sini nga puluy-an sa idalom sang Lupit Bridge matapos nga hinali nagtaas ang tubig sa Lupit river sa Brgy Singcang-Airport, Bacolod City.
Makaluluoy ang sitwasyon sang pito ka pamilya nga nagapuyo sa idalom sang Lupit Bridge sa bahin nga malapit sa Abad Church sang sila ang ginbisitahan sang Bombo News Team kahapon sang aga.
Antes paman, sila ang una na nga gintsekyar sang Bacolod City Disaster Risk Reduction and Management Office matapos gin-anod sang tubig ang dingding sang hayob-hayob, kag ang papag nga tululugan na lamang ang nabilin.
Ini ang ginanag-iyahan ni Nanay Remenia, 68 anyos, nga duha ka tuig na sa lugar.
Sa interview sang Bombo Radyo Bacolod kay Atty Marty Go, Bacolod City Secretary to the Mayo, humalin sang nagsaka ang tubig sa nasambit nga taytay sang tinalikdan nga gab-i, nagdihon ang alkalde sang Task Force nga ginabug-usan sang DSSD, City Health Office, DRRMO, Bacolod Housing Authority kag City Legal agud nga tsekyaron ang sitwasyon sang mga nagapuyo sa idalom sang taytay.
Sa pagpadulong nila sa area, nakita nga may yara sang pito ka pamilya nga nagapuyo sa lugar, kag gin-assess naman ang ila nga sitwasyon.
Sa karun, hatagan lang anay sang temporaryo nga maistaran ang nasambit nga mga pamilya samtang ginapangitaan sang ciudad ang mga ini sang lugar nga permanente nga maestaran para sa ila nga seguridad.
