Pito ka sako sang canister nga naga-unod sang Liquefied petroleum gas (LPG) ang narekober sang City Legal Enforcement Unit Team kaupod ang Business Permits and Licensing Office (BPLO) sa ginpatigayon nga operation kahapon sa Burgos Public Market.
Sa interview sang Bombo Radyo Bacolod kay Rey Demisana, pinuno sang enforcement unit sang Bacolod City Legal Office, may yara sang 20 ka mga manugbaligya sang butane sa merkado kun sa diin 13 diri ang nakuhaan sang canister, apat ang sirado kag tatlo ang nag-untat na sa pagbaligya sang butane.
Suno diri, ang mga narekober nga butane yara sa karun sa Bacolod Arts & Youth Sports Center amo nga hugot nga ginadumilian ang pagpanigarilyo kag paggamit sang kalayo sa area.
Dugang pa sini, ang mga narekober nga canister amo ang naga-unod sang LPG kag indi Butane.
Pahayag ni Demisana, may yara sang nagasupply sang butane nga pamilyar sa ila nga amo isa ka negosyante nga napasirado ang negosyo bangod nga wala sang business permit.
Padayon sa karun ang ila monitoring kun nagapadayon pa ini sa pagbaligya kag pagdeliver sang caniser nga may unod nga LPG.
Sa karun, ila lamang ginakumpiskar ang mga cannister apang kun liwat nga magbalik sa pagbaligya ang mga ini, sila ang posible nga pasakaan sang kaso kag ipasira ang ila negosyo.
