Ginbawi sang pito ka mga Senador ang ila mga pirma nagikan sa committee report sa Senate Bill 1979 ukon ang controversial Adolescent Pregnancy Prevention Bill, sa tunga sang mga kahangawa sang iban nga grupo natuhoy sa provision sa Comprehensive Sexual Education.
Sa isa ka sulat nga ginpadala kay Senate President Francis “Chiz” Escudero sang Martes, ginpahayag nanday Senador JV Ejercito, Nancy Binay, Cynthia Villar, kag Bong Go, nga ila ginabawi ang ila suporta sa nasambit nga hagna.
Suno sa mga ini, madamo pa ang kinahanglan nga diskusyunan sa hagna nga dapat kaupod ang mga stakeholders.
Sa separado nga sulat, ginpahayag naman ni Senator Jinggoy Estrada nga iya ginawithdraw ang iya suporta sa hagna matapos sini nga gintun-an ang mga sentimento kag grave concerns sang pila ka mga private organizations nga nagpabutyag sang makusog nga opposition sa proposed legislation.
Suno naman kay Sen. Ramon ”Bong” Revilla Jr., ginaatras sini ang iya suporta sa hagna bangud makit-an sini ang kaugalingon nga nagakonflikto sa posible nga outcomes kun ini ang mangin layi.
Ginbawi man ni Senator Loren Legarda ang perma sini sa committee report sang SB 1979.
