May yara na sang global positioning system (GPS) ang pito ka truck nga nagakolekta sang basura sa siyudad sang Bacolod kag lauman nga dugang pa nga ma-installan ang 45 ka mga garbage truck.
Sa interview sang Bombo Radyo kay Ramel Palalon, officer in charge sang Department of Public Services, nagpadulong sa iya opisina sang Huwebes ang IPM representatives gikan sa Manila para mag-eksplekar sang proseso sa iga-install nga GPS application sa mga garbage trucks.
Suno diri, kun matapos na nga ma-installan sang app ang tanan nga truck, gilayon ini nga gamiton sa pagtrabaho.
Mahimo nga malantaw sang local residents sa internet ang real time data kun sa diin ila makit-an ang byahe sang truck kun malapit na sa barangay, kasubong man nga yara nakadetalye ang pangalan sang drayber, palero kag number sang truck.
Ini ang isa ka pamaagi para mahibaluan kun nahakot ang basura sa isa ka area kag amo man nga kun may yara sang complain nga wala sang may naglabay nga garbage truck mahimo ini nga ma tsekyar pamaagi sa monitrong sa app.
Samtang iga-train pa ang mga drayber sang truck sa paggamit sang GPS app, apang pahanugyan ni Palalon nga apisar nga provided sang IPM ang cellphone kag load nga gamiton para sa app, mahimo kun tani nga gamiton ini sang husto sang mga drayber.
Samtang, amat-amat na sini nga ginapanugyan sa mga barangay nga magsubmit sang pick up point para mahibaluan ang area kun sa diin pagahakuton ang mga basura.
Sa karun, pito na sa mga truck ang na-installan apang ini pa ang madugangan sa ginaekspektaran nga 45 ka mga garbage trucks nga ma-insattlan man sang GPS application.
